Kulik …kulik…..kuliki langit meganjang
Kujange ranggas ras bulung-bulung
Kujange batang-batang kerangen belang
Kujange lawesna kayu si meledang
Kulik …kulik…kuliki mayap-ayap
Kapak ise nge si entelap
Maka delengpe nggo mesap-sap
Pusuh isenge si mekeng
Maka mbal-mbal pe enggo meseng
Kulik …kulik…kuliki terkettes
Ingan kami ragat-agat nggo i pangus
Asar kami ciciope enggo i rambas
Deleng ndai pe enggo ndurgis
Lau enggo kerah, kalah-kalah muas
Kulik…kulik…kuliki nono
Adi soraku nggo pero
La erkiteken tangis ate gogo
Tapi serko ngidah lau belin erdeso
Dempari na rumah, sapo, lipo
Ombakna kerbo
Kuta melungun, pusuh meriso
Kulik…kulik…kuliki terjelpa-jelpa
Erkiteken pengelako jelma
Jelma si la meteh tengka
Si lale megiken pedah Dibata
Lale ngkelengi doni ras isina
Lale ngkelengi rubia-rubia
Lale ertinading man kempuna
Kulik…kulik…kuliki nggir-gir
Ngidah kalak erpangir
Lanai ibas pancur
Tapi ibas lau sumur
Lanai lit abu dapur
Tapi shampo i tukur
Kulik … kulik..... nina kuliki
Soraku enggo keri
Erkiteken jelma si kemali
Dahinna ncedai pertibi
Reh mara kleisa la ngadi-ngadi
(HMS-Ndepox, 04/04/2016)
No comments:
Post a Comment